गजल

नदी कहिले चैं आफ्नो इच्छाले बगेको छ ?
ओरालो जता जता  उतै बग्नु परेको छ ।

बन्द नहोस ,जुलुश नहोश दैब कतै ।

त्यो बाटो हुँदै भर्खर यो मन गएको छ ।

फ्याँकेर आउन यी खाली बोतलहरु यार ।

लागोस भर्खर त पिउन शुरु भएको छ ।

खाली उल्टो सोच्छ दिनेश सधैंभरि ताकी ।
दुनियाँलाई लागोस अलिकति पढेको छ ।

गजल

टाढैबसी हात हल्लायो र गयो ।

जसोगरी जवानी आयो र गयो ।

परदेशबाट आएको परदेशी ।

नछुटिने कसम खायो र गयो ।

प्यासीहरु पानीको आसमा रहे ।

कुवा खन्नेले पैसा बगायो र गयो ।

गजलले के गर्ला ?एक शेरले त ।

मलाई निन्द्राबाट उठायो र गयो ।

गजल

मैले आमालाई माया गर्छु भन्नू झुट्टा हुन्छ ।

बेचिनु पर्ने रुमालमा नै फूल बुट्टा हुन्छ ।

साँचो छोराछोरी त्यो स्वर्गमा बस्छन यार ।
जहाँ शीर झुक्दा सदा आमाको खुट्टा हुन्छ ।

भर्खरै आयो ऊ आमालाई बृध्दाश्रम छोडेर ।
नयाँ जमानामा शीर भएको मुर्कुट्टा हुन्छ ।

गजल

पूरै नहोला अलिअलि, हो बिश्वास लाग्छ ।
बुढापाका भन्थे यो कली, हो बिश्वास लाग्छ ।

कति चम्किएला र  कति उफ्रिएला र अब ।
फूल छउन्जेल  पुतली , हो बिश्वास लाग्छ ।

जिन्दगीलाई इच्छा जस्तै , तेल नहुँदो हो त ।
डढी सकिनेछ सुतली , हो बिश्वास लाग्छ ।

हामी बाँचेकोनै रहेछौं यति हेर्नलाई ।
कुर्सीको अदली- बदली , हो बिश्वास लाग्छ ।

यसरी जोतिनु रहेछ र पो केटाकेटीमै ।
आमाले भन्नुभाथ्यो हली , हो बिश्वास लाग्छ ।

गजल

शत्रुहरुले पनि योगदान सम्झनेछन ।
मृत्युपछि सबैले महान सम्झनेछन ।

हल्लैहल्लामा कागको पछि दौडिनेहरु ।
फर्कनेछन जुनदिन कान सम्झनेछन ।

कोठाको रौनक हराएको कारण खोज्दै ।
कोही फूल कोही फूलदान सम्झनेछन ।

ए लाहुरे कुनैदिन गाउँका ढुंगा पनि ।
तँ सँग ठोक्किनु अपमान सम्झनेछन ।

दिनेशको जस्तै मन दुख्दा उनले पनि ।
कतै आमा कतै भगवान सम्झनेछन ।

गजल

यस्तै निरन्तरको भय मुर्दाबाद । 

म बाँचिरहेको समय मुर्दाबाद । 

माथि देउताको जुलुश निस्कियो । 

मान्छेले गरेका प्रलय मुर्दाबाद । 

उनी मुस्काइन म गम्दै गम्दै हिंडे । 

मन पगाल्ने तिम्रो आसय मुर्दाबाद । 

लाखौंले हारेर एकले जित्छ भने । 

क्रान्ति मुर्दाबाद विजय मुर्दाबाद । 

प्यासीको तिर्खा मेटाउन नसक्ने । 

खोला ,पधेँरा ,जलाशय मुर्दाबाद । 

गजल

उमेरसँगै म मा सरेका हुन दुख त ।


हजुरबा, बुबाले गरेका हुन दुख त ।


भाग्य त्यो एकातिर अर्को मेरो पौरख ।

साँढेको जुधाइमा परेका हुन दुख त ।


ढलाउन मलाई तिम्रो भगवानले ।

पाइला पाइलामा छरेका हुन दुख त ।


बेइमान त तिमी होलाऊ ऊ नि होला ।

समुन्द्र सँगसँगै तरेका हुन दुख त ।



दिनेशलाई दिनेश बनाउँछु भन्दै ।

मलाई खोज्दै धर्ती झरेका हुन दुख त ।