Monday 8 December 2014

गजल

विधवाले रहर सजाएझैं आउँछ । 
याद आउँछ ,याद आएझैं आउँछ । 

हातमा बोकेर दियो , बाती , तेल । 
यो साँझ सूर्यसँग लजाएझैं आउँछ । 

सल्लाको वनमा आउने हुरी पनि । 
गाइने दाइले गीत गाएझैं आउँछ ।

कहाँ छोड्छ र हिजोले तिमीलाई। 
बालकले खेलौना  पाएझैं आउँछ ।   

हाँसी - हाँसी आउँछ कैले दुख पनि । 
खुशी पनि कैले सताएझैं आउँछ ।


Friday 19 September 2014

गजल

धुवाँ र रक्सी कठै बहाना हुन् ।
दोषी त जिन्दगीका पाना हुन् ।

मनको परिभाषा यसरी दिऊँ ।
छालाले घेरिएका अचाना हुन ।

साथीले मलाई चिनायो यसरी ।
यि अन्धा भए पहिले काना हुन ।

संस्कार बुझ्ने आदरणीय छन् ।
चाहे ठूला हुन चाहे साना हुन् ।

बर्षा कटेपछि भुसुक्कै बिर्सें ।
पानी छेक्ने घरको छाना हुन ।


Friday 29 August 2014

गजल

यहाँ भोक भेटियो त्यहाँ भोग भेटियो ।
उल्टो त्यहाँ उपचार यहाँ शोक भेटियो ।

जिन्दगीलाई फर्किएर खोज्दै जाँदा ।
धेरै काँडामा पैतालाको डोब भेटियो ।

हावाले सिकाएथे नाँच्न मलाई तर ।
पातले खस्दै भन्यो हाँगामा बोझ भेटियो ।

खोजी खुशीको थियो दिनेशको पनि  ।
बाँच्दै जाँदा तर धेरै थोक भेटियो ।

Saturday 9 August 2014

गजल

नदी कहिले चैं आफ्नो इच्छाले बगेको छ ?
ओरालो जता जता  उतै बग्नु परेको छ ।

बन्द नहोस ,जुलुश नहोश दैब कतै ।
त्यो बाटो हुँदै भर्खर यो मन गएको छ ।

फ्याँकेर आउन यी खाली बोतलहरु यार ।
लागोस भर्खर त पिउन शुरु भएको छ ।


खाली उल्टो सोच्छ दिनेश सधैंभरि ताकी ।
दुनियाँलाई लागोस अलिकति पढेको छ ।

Friday 18 July 2014

गजल

टाढैबसी हात हल्लायो र गयो ।
जसोगरी जवानी आयो र गयो ।

परदेशबाट आएको परदेशी ।
नछुटिने कसम खायो र गयो ।

प्यासीहरु पानीको आसमा रहे ।
कुवा खन्नेले पैसा बगायो र गयो ।

गजलले के गर्ला ?एक शेरले त ।
मलाई निन्द्राबाट उठायो र गयो ।

Tuesday 24 June 2014

गजल

मैले आमालाई माया गर्छु भन्नू झुट्टा हुन्छ ।
बेचिनु पर्ने रुमालमा नै फूल बुट्टा हुन्छ ।

साँचो छोराछोरी त्यो स्वर्गमा बस्छन यार ।
जहाँ शीर झुक्दा सदा आमाको खुट्टा हुन्छ ।

भर्खरै आयो ऊ आमालाई बृध्दाश्रम छोडेर ।
नयाँ जमानामा शीर भएको मुर्कुट्टा हुन्छ ।


Thursday 20 February 2014

गजल

पूरै नहोला अलिअलि, हो बिश्वास लाग्छ ।
बुढापाका भन्थे यो कली, हो बिश्वास लाग्छ ।

कति चम्किएला र  कति उफ्रिएला र अब ।
फूल छउन्जेल  पुतली , हो बिश्वास लाग्छ ।

जिन्दगीलाई इच्छा जस्तै , तेल नहुँदो हो त ।
डढी सकिनेछ सुतली , हो बिश्वास लाग्छ ।

हामी बाँचेकोनै रहेछौं यति हेर्नलाई ।
कुर्सीको अदली- बदली , हो बिश्वास लाग्छ ।

यसरी जोतिनु रहेछ र पो केटाकेटीमै ।
आमाले भन्नुभाथ्यो हली , हो बिश्वास लाग्छ ।

Wednesday 15 January 2014

गजल

शत्रुहरुले पनि योगदान सम्झनेछन ।
मृत्युपछि सबैले महान सम्झनेछन ।

हल्लैहल्लामा कागको पछि दौडिनेहरु ।
फर्कनेछन जुनदिन कान सम्झनेछन ।

कोठाको रौनक हराएको कारण खोज्दै ।
कोही फूल कोही फूलदान सम्झनेछन ।

ए लाहुरे कुनैदिन गाउँका ढुंगा पनि ।
तँ सँग ठोक्किनु अपमान सम्झनेछन ।

दिनेशको जस्तै मन दुख्दा उनले पनि ।
कतै आमा कतै भगवान सम्झनेछन ।